Xəbərlər

"Novruz- 2026" düşərgəsi çərçivəsində tanınmış şair, yazıçı və kinodramaturq, İlqar Fəhmi ilə görüş keçirilib

Azərbaycan Həmkarlar İttifaqları Konfederasiyasının (AHİK) üzv təşkilatı olan Elm və Təhsil İşçiləri Həmkarlar İttifaqı (ETİHİ) Respublika Komitəsinin “Təhsil İstirahət Mərkəzi”ndə ali, orta ixtisas və peşə təhsili müəssisələrinin əməkdaşları üçün təşkil etdiyi “Novruz 2026” düşərgəsi çərçivəsində tanınmış yazıçı və kinodramaturq, əməkdar mədəniyyət işçisi İlqar Fəhmi ilə görüş keçirilib.

Görüş 2026-cı ilin Fəaliyyət Planında nəzərdə tutulmuş “Azərbaycan dilinin qorunması” üzrə tədbirlər çərçivəsində həyata keçirilib.

“Ədəbi dilimiz estetik-psixoloji müstəvidə” mövzusuna həsr olunan görüşdə yazıçı Azərbaycan dilinin saflığının qorunmasında ədəbiyyatın rolundan bəhs edib. O bildirib ki, ölkə başçısının Azərbaycan dilinin qorunması istiqamətində ictimaiyyətə ünvanladığı tövsiyələr mühüm əhəmiyyət kəsb edir və bu prosesdə təhsil işçilərinin müstəsna xidmətləri var. 

Qeyd olunub ki, qloballaşan dünyada dilin xarici təsirlərdən qorunması çətinləşsə də, ədəbiyyat və dilçilik sahəsində nəşrlər bu istiqamətdə mühüm rol oynayır.

Tədbirdə ETİHİ Respublika Komitəsi sədrinin birincu müavini Tehranağa Abdullayev çıxış edərək Azərbaycan dilinin saflığının qorunmasının komitənin fəaliyyət planının əsas istiqamətlərindən biri olduğunu vurğulayıb. Bildirilib ki, bu sahədə mütəmadi tədbirlər həyata keçirilir və məsələ təşkilatın prioritetləri sırasında xüsusi yer tutur.

Tədbir iştirakçıları Azərbaycan dilinin inkişafı və qorunması ilə əlagədar onları maraqlandıran sualları və təklifləri səsləndiriblər. Maraqlı müzakirələrlə keçən tədbir iştirakçılar tərəfindən rəğbətlə qarşılanıb, bu cür müzakirələrin davamlı olması təklif olunub.

ETİHİ-nin “Novruz 2026” düşərgəsinin ikinci mərhələsinə start verilib

Ramazan və Novruz bayramları münasibətilə tətil günlərində təşkil edilən düşərgəyə 800-dən çox ittifaq üzvü cəlb olunub

Azərbaycan Həmkarlar İttifaqları Konfederasiyasının (AHİK) üzv təşkilatı Elm və Təhsil İşçiləri Həmkarlar İttifaqı (ETİHİ) Respublika Komitəsi tərəfindən “Təhsil İstirahət Mərkəzində” təşkil olunan ali, orta ixtisas və peşə təhsili müəssisələrinin əməkdaşları üçün “Novruz 2026” adlı düşərgəsinin ikinci mərhələsinə start verilib.

İki mərhələdə keçirilən düşərgəyə ümumilikdə 800- dən çox təhsil işçisi cəlb olunub.

Düşərgənin ikinci hissəsinin rəsmi açılış mərasimində Elm və Təhsil İşçiləri Həmkarlar İttifaqı Respublika Komitəsi sədrinin birinci müavini Tehranağa Abdullayev çıxış edərək Azərbaycan Həmkarlar İttifaqları Konfedrasiyasının sədri Sahib Məmmədov və ETİHİ Respublika Komitəsinin sədri Araz Paşayevin bayramlar münasibətilə təhsil işçilərinə təbriklərini çatdırıb, düşərgədə iştirak edən ittifaq üzvlərinə xoş istirahət və gələcək fəaliyyətlərində uğurlar arzu edib.

Əməkdar mədəniyyət işçisi şair, yazıçı, kinodramaturq İlqar Fəhmi təhsil ictimaiyyəti ilə tədbirdən böyük məmnunluq hissi keçirdiyini söyləyərək bu düşərgənin təşkil olunmasına görə Elm və Təhsil İşçiləri Həmkarlar İttifaqının rəhbərliyinə, əməyi keçən hər kəsə öz minnətdarlığını bildirib.

Tədbir rəsmi hissədən sonra tonqal ətrafında əyləncəli proqramla davam etdirilib.

Qeyd edək ki, tətil günlərində davam edən düşərgə proqramı çərçivəsində təhsil işçiləri üçün zəngin və çoxşaxəli maraqlı fəaliyyət planı hazırlanıb. Proqram həm milli-mədəni dəyərlərin təbliğini, həm də təhsil işçilərinin peşəkar inkişafını təşviq etməyə yönəlib.

Bayram tədbirləri çərçivəsində Novruzun qədim ənənələrini əks etdirən müxtəlif mədəni və əyləncəli tədbirlər təşkil edilib.

Bununla yanaşı, düşərgə müddətində Azərbaycanın tanınmış elm xadimləri və mütəxəssislərinin iştirakı ilə müxtəlif mövzularda təlim və seminarlar da təşkil olunub.

Novruz 2026” düşərgəsində təhsil işçiləri üçün süni intellekt mövzusunda təlim keçirilib

21–25 mart tarixlərində təşkil olunan “Novruz 2026” düşərgəsi çərçivəsində Elm və Təhsil İşçiləri Həmkarlar İttifaqı Respublika Komitəsinin üzvləri üçün “Təhsildə süni intellekt: yeni perspektivlər” mövzusunda maarifləndirici təlim keçirilib.

Təlim Mədəniyyət və İncəsənət Universitetinin Televiziya və Kino Studiyasının müdiri, süni intellekt üzrə mütəxəssis Azər Həsənov tərəfindən təqdim olunub. Tədbirin əsas məqsədi təhsil işçilərini süni intellekt texnologiyalarının imkanları ilə tanış etmək, onların tədris prosesində praktik tətbiq yollarını göstərmək və müasir rəqəmsal alətlərdən səmərəli istifadə bacarıqlarını inkişaf etdirmək olub.

Məlumat üçün bildirək ki, düşərgə iştirakçılarının çoxsaylı istəyi nəzərə alınaraq “Təhsildə süni intellekt: yeni perspektivlər” mövzusunda maarifləndirici təlim düşərgənin son günündə açıq hava şəraitində növbəti dəfə təşkil olundu.

Təlim zamanı iştirakçılara süni intellektin ümumi prinsipləri, müəllim və tələbələr üçün istifadəsi, dərs prosesinə inteqrasiyası, eləcə də məzmun yaradılması, vizual və video generasiya imkanları barədə praktiki nümunələr təqdim edilib. Bununla yanaşı, süni intellektdən istifadə zamanı etik qaydalar, akademik dürüstlük və plagiat məsələlərinə də xüsusi diqqət yetirilib.

Sessiya interaktiv müzakirələr və sual-cavab formatında davam edib. Təhsil işçilərinin fəal iştirakı ilə keçən görüş iştirakçılar tərəfindən böyük maraqla qarşılanıb və mövzu ətrafında geniş fikir mübadiləsi aparılıb.

Qeyd edək ki, bu cür təlimlər təhsil işçilərinin rəqəmsal bacarıqlarının artırılması və müasir texnologiyaların tədris mühitinə inteqrasiyası baxımından mühüm əhəmiyyət daşıyır.

“Novruz 2026” düşərgəsində “Muğam aləminə səyahət” adlı görüş təşkil olunub

Azərbaycan Həmkarlar İttifaqları Konfederasiyasının üzv təşkilatı Elm və Təhsil İşçiləri Həmkarlar İttifaqı (ETİHİ) Respublika Komitəsinin təşkilatçılığı ilə keçirilən “Novruz 2026” düşərgəsi çərçivəsində “Muğam aləminə səyahət” adlı görüş baş tutub.

Tədbirdə çıxış edən ETİHİ Respublika Komitəsinin sədr müavini Mirzə Cəfərzadə milli-mənəvi dəyərlərimizin qorunması və təhsil işçilərinə, o cümlədən gənc nəslə aşılanması baxımından belə görüşlərin əhəmiyyətini vurğulayıb. Bildirib ki, muğam sənəti xalqımızın zəngin mədəni irsinin ayrılmaz hissəsidir və bu irsin təbliği istiqamətində həyata keçirilən tədbirlər xüsusi önəm daşıyır.

Görüşdə Xalq artisti Teyyub Aslanov muğamın tarixi kökləri, ifaçılıq ənənələri və Azərbaycan musiqi mədəniyyətində tutduğu yer barədə ətraflı məlumat verib, iştirakçıların suallarını cavablandırıb.

Daha sonra Teyyub Aslanov tarda Vüsal Qasımovun, kamançada Anar Yusubun müşayiəti ilə muğam nümunələri və xalq mahnıları səsləndirib.

İfa olunan musiqi nömrələri düşərgə iştirakçıları tərəfindən maraq və alqışlarla qarşılanıb.

ETİHİ ittifaq üzvləri üçün tətil günlərində bayram düşərgəsi təşkil edib

Ramazan və Novruz bayramları münasibətilə tətil günlərində təşkil edilən düşərgəyə 800-ə yaxın ittifaq üzvü cəlb olunub.

Azərbaycan Həmkarlar İttifaqları Konfederasiyasının (AHİK) üzv təşkilatı Elm və Təhsil İşçiləri Həmkarlar İttifaqı (ETİHİ) Respublika Komitəsi tərəfindən “Təhsil İstirahət Mərkəzində ” ali, orta ixtisas və peşə təhsili müəssisələrinin əməkdaşları üçün “Novruz 2026” adlı düşərgə təşkil olunub.

İki mərhələdə tışkil edilən düşərgədə ümumilikdə 800-ə yaxın təhsil işçisi iştirak edəcək.

Düşərgənin 1-ci hissəsinin açılış mərasimində Elm və Təhsil İşçiləri Həmkarlar İttifaqı Respublika Komitəsi sədrinin müavini Mirzə Cəfərzadə çıxış edərək komitə sədri Araz Paşayevin Müqəddəs Ramazan və Novruz bayramları münasibətilə təhsil işçilərinə təbriklərini çatdırıb, düşərgədə iştirak edən respublikanın müxtəlif bölgələrindən olan ali, orta ixtisas və peşə təhsili müəssisələrində çalışan ittifaq üzvlərinə xoş istirahət və gələcək fəaliyyətlərində uğurlar arzu edib.

Tətil günlərində davam edən düşərgə proqramı çərçivəsində təhsil işçiləri üçün zəngin və çoxşaxəli maraqlı fəaliyyət planı hazırlanıb. Proqram həm milli-mədəni dəyərlərin təbliğini, həm də təhsil işçilərinin peşəkar inkişafını təşviq etməyə yönəlib.

Bayram tədbirləri çərçivəsində Novruzun qədim ənənələrini əks etdirən müxtəlif mədəni və əyləncəli tədbirlər təşkil edilib.

Bununla yanaşı, düşərgə müddətində Azərbaycanın tanınmış elm xadimləri və mütəxəssislərinin iştirakı ilə müxtəlif mövzularda təlim və seminarlar da təşkil olunacaq.

ETİHİ Respublika Komitəsinin üzv təşkilatlarında təhsil işçilərinə iftar süfrələri təşkil edilib.

Elm və Təhsil İşçiləri Həmkarlar İttifaqının şəhər və rayon üzv təşkilatları tərəfindən müqəddəs Ramazan ayı münasibətilə iftar süfrələri təşkil olunub.

Bu tədbirlərdə şəhid və qazi ailələri, ittifaq üzvləri, həssas sosial qrupdan olan şəxslər iştirak edib, birlik və həmrəylik ruhu, milli-mənəvi dəyərlərə bağlılıq xüsusi vurğulanıb.

İftar süfrələrində Azərbaycanın bütövlüyü uğurunda canlarından keçmiş şəhidlərin əziz xatirəsi bir dəqiqəlik sükutla yad edilib, xalqımızın əmin amanlığı, sabitliyi üçün dualar oxunub, mərasim tədbir iştirakçılarının xoş təssüratları ilə davam etdirilib.

ETİHİ Laçın Rayon Komitəsi 8 Mart Beynəlxalq Qadınlar Günü münasibətilə Laçın rayonunun bölgələrində fəaliyyət göstərən təhsil işçiləri ilə görüş keçirib.

ETİHİ Laçın Rayon Komitəsi tərəfindən 8 Mart – Beynəlxalq Qadınlar Günü münasibətilə Laçın rayonu üzrə bölgələrdə fəaliyyət göstərən təhsil müəssisələrində çalışan bir sıra təhsil işçilərinin iştirakı ilə görüş keçirilib. Görüş zamanı təhsil nəticələri ilə fərqlənən xanım müəllimlər və müəssisə rəhbərləri bayram münasibətilə təbrik olunub, onlara fəxri fərman və hədiyyələr təqdim edilib.

ETİHİ Laçın Rayon Komitəsində 8 Mart – Beynəlxalq Qadınlar Günü qeyd olunub.

ETİHİ Laçın Rayon Komitəsi tərəfindən 8 Mart – Beynəlxalq Qadınlar Günü münasibətilə tədbir təşkil olunub. Tədbirdə təhsil sahəsində uzun illər səmərəli fəaliyyət göstərmiş təqaüdçü və təhsil nəticələri ilə fərqlənən müəllimlər bayram münasibətilə təbrik ediliblər. Onlara səmərəli fəaliyyətlərinə görə fəxri fərmanlar və hədiyyələr təqdim olunub.

Tədbir zamanı qadınların təhsil sahəsindəki rolu xüsusi vurğulanıb və bütün xanımlara bayram münasibətilə xoş arzular çatdırılıb.

ETİHİ Laçın Rayon Komitəsi "Ana harayı" abidəsini ziyarət edib

Bu gün Elm və Təhsil İşçiləri Həmkarlar İttifaqı Laçın Rayon Komitəsinin əməkdaşları 26 Fevral – Xocalı soyqırımının 34-cü ildönümü ilə əlaqədar “Ana harayı” abidəsini ziyarət edib.

Komitənin kollektivi Xocalı soyqırımı qurbanlarının əziz xatirəsi dərin ehtiramla yad edərək, abidə önünə gül dəstələri düzüb.

ETİHİ Laçın RK İlk təşkilat sədrləri "Nazlı Bulaq" istirahət mərkəzində istirahət ediblər.

21–22 fevral tarixlərində Azərbaycan Həmkarlar İttifaqları Konfederasiyası, Elm və Təhsil İşçiləri Həmkarlar İttifaqı Respublika Komitəsinin təşəbbüsü, ETİHİ Laçın Rayon Komitəsinin təşkilatçılığı ilə Elm və Təhsil İşçiləri Həmkarlar İttifaqı Laçın Rayon Komitəsinin ilk təşkilat sədrləri Quba rayonunun səfalı guşələrindən biri olan Xınalıq kəndində yerləşən Nazlı Bulaq İstirahət Mərkəzində istirahət ediblər. Qarlı dağ mənzərəsi, təmiz hava və səmimi mühit həmkarlarımız üçün həm dincəlmək, həm də bir-biri ilə daha yaxından ünsiyyət qurmaq imkanı yaradıb.

Tədbirin əsas məqsədi ittifaq üzvləri arasında əlaqələrin möhkəmləndirilməsi, həmrəyliyin gücləndirilməsi və fəalların sosial rifahının dəstəklənməsidir. Bu kimi təşəbbüslər ittifaq üzvlərinin motivasiyasına müsbət təsir göstərir, aralarındakı əlaqələri daha da möhkəmləndirir və gələcək fəaliyyət üçün əlavə ruh yüksəkliyi yaradır.

2 Fevral – Azərbaycan Gəncləri Günü münasibətilə Laçın rayon məktəblərinin gənc müəllimləri ilə görüşlər keçirilib

2 Fevral – Azərbaycan Gəncləri Günü münasibətilə Elm və Təhsil İşçiləri Həmkarlar İttifaqı Laçın Rayon Komitəsi tərəfindən Laçın rayon məktəblərində çalışan gənc müəllimlərlə görüşlər keçirildi. Görüşlər zamanı gənclərin təhsil sahəsindəki rolu, müəllim peşəsinin məsuliyyəti və gənc müəllimlərin üzərinə düşən vəzifələr barədə səmimi söhbətlər aparıldı.

Tədbir çərçivəsində təhsil sahəsində yüksək nəticələr göstərən bir sıra gənc müəllimlər Gənclər Günü münasibətilə hədiyyələr və fəxri fərmanlarla təltif olundu. Bu təşəbbüs gənc müəllimlərə dəstək olmaq və onların əməyinə göstərilən diqqət və qayğının ifadəsi idi.

Elm və Təhsil İşçiləri Həmkarlar İttifaqı Laçın Rayon Komitəsi gənc müəllimlərin peşəkar fəaliyyətində daim uğurlar arzulayır!

Elm və Təhsil İşçiləri Həmkarlar İttifaqı Laçın Rayon Komitəsi 20 Yanvar şəhidlərini ehtiramla yad edib

20 Yanvar faciəsinin ildönümü ilə əlaqədar Elm və Təhsil İşçiləri Həmkarlar İttifaqı Laçın Rayon Komitəsinin nümayəndələri Şəhidlər Xiyabanını ziyarət ediblər.

Ziyarət zamanı Vətənimizin azadlığı və müstəqilliyi uğrunda canlarından keçmiş qəhrəman şəhidlərimizin əziz xatirəsi dərin ehtiramla yad olunub, məzarları üzərinə gül dəstələri qoyulub, ruhlarına dualar oxunub. 20 Yanvar şəhidlərinin göstərdiyi qəhrəmanlıq və xalqımızın azadlıq uğrunda nümayiş etdirdiyi qətiyyət tariximizin şanlı və unudulmaz səhifələrindəndir. Bu faciə eyni zamanda xalqımızın birliyinin, mübarizə ruhunun və müstəqillik əzminin rəmzidir.

Şəhidlərimizin xatirəsi daim qəlbimizdə yaşayacaq.

Allah bütün şəhidlərimizə rəhmət eləsin!